奶貓對奶敏感

醫療案例:

三隻貓BB生於1月26日。
由於阿媽湊都越嚟越瘦弱，而且未能停止肚屙，所以送嚟我度尋生機。

佢地兩星期大到我手, 當時已瘦弱，不夠200克，屙黃色gel帶血便便，表面症狀似傷風。

止屙、腸胃藥、益生菌等等對肚屙完全無幫助，兩星期內用過四款奶，都一樣屙，分別只係由色黃有血變成啡色爛便而已。
隔日要沖涼但咕咕同大脾都「噏」到紅晒並甩毛。

傷風表徵醫得好，但爛口爛鼻爛肉球就三款藥都無效，但再爛去就咩都食唔落了。
所以推算貓BB連奶都可能敏感，而腸吸收力本身都有問題。所以我試用推薦俾家長醫爛口貓用的cbd。之後每日滴爛鼻同肉球, 終於有進展。
鼻要滴三日先好，肉球要七日，口腔完全不再鮮紅一撻撻更需要十日時間。

因為佢地又屙又病，飲奶量少，平均每四小時只有5-20ml。
吸收力差又肚屙，要吊住條命等滿月戒奶！

當然有用啲手段～
早晚用一粒5A俾三隻分，早晚打10ml皮下水，隔日0.05B12針劑。

直到滿月，強制戒奶。努力餵由鮮食打成既糊，要營養均衡, 所以當然有加入埋金牌營養肉粉。
餵咗一星期，佢地能夠完全自己食糊糊並食足夠份量，之後就放手俾佢地自己食。

每日六碟少食多餐，六星期大就完全停晒屙泥漿，重量超過300克。
當然所有奶媽都知道, 六星期大300克根本唔正常。
係唔正常地成長, 好過睇住佢地拉柴丫嘛。