奶貓救援
已入秋既某一日，收到朋友既電話，話喺車房見到2隻奶貓，但不見貓媽媽縱影。
加上朋友已經移動過啲奶貓,貓媽媽可能唔會接番黎照顧。
睇下有無機構接手? 但紅日搵唔到人接電話。問下義工有無床位? 無位啦，真係好full。
得一隻手掌咁大，眼都未開，唯有膽粗粗接左番屋企先再算。準備好飛機箱+暖水袋+毛巾，就接奶貓啦。MeowC9亦叫我地準備動物診所買既貓奶餵貓，但紅日大部份診所都無開，唯有去寵物店買奶粉。
就係呢個決定，我送左一隻奶貓去彩虹橋, 仲差啲送埋另一隻奶貓去。
原來⋯好多寵物店售貨員都唔知，奶貓同幼貓奶粉係有分別。
原來…唔係所有奶貓奶粉都啱初生奶貓。
原來⋯每日每2個鐘餵一次都唔係真嫁⋯⋯
當時既我買咗寵物店員推薦既奶粉，按照貓奶粉罐上既每2個鐘餵一次，每次2-4ml，加暖濕水幫助排便。如是者過左7日，其中一隻奶貓晚餐時間無廁所去，再過2個鐘連奶都唔食。心知不妙既我即刻帶佢衝去睇急症，之後我又再一次做錯決定，搵咗邊度快啲有位睇就去邊間。
結果醫生見貓有反應, 佢覺得奶貓過一陣會再食奶, 收我4位數字後就打發我走。
返到屋企，奶貓反應更虛弱無力，我即刻聯絡Meow C9，再衝去佢度做急救。
去到MeowC9度先發現, 2隻奶貓都病了，只係程度不一。發燒，脫水，營養不良，有鼻水,低溫⋯⋯
原來⋯食唔食得夠，睇個肚腩夠唔夠飽滿就知。
原來⋯有無脫水，睇下啲皮膚拉起回彈慢唔慢就知。
只係個醫生咩都唔知，喺黃金時間打發我走，錯過最佳急救時間。有一隻已經返魂無術了，另一隻都未渡過危險時期⋯⋯
未渡過危險時期既奶貓即時要：
打皮下水 + 打B雜 + 餵抗生素 + 餵病癒康復處方奶。
喺Meow C9 悉心照顧下，3日就離開深切治療部，之後就送番去我屋企作重症治療。
剛接回家 (約10日大的奶貓)
每日餵5-6餐 (約4個鐘一次，戒夜奶了，自己可以瞓7-8小時)
第一天:每餐8-10ml奶量; 168g體重
第二天:每餐11-17ml奶量; 184g體重
第三天:每餐14-18ml奶量; 193g體重
第四天:每餐18-25ml奶量; 203g體重
隔餐加肝supplements及5a，終於慢慢越食越多，體重亦都有增無減。
但由於身體太弱，隔2日就要打一次B雜，總共打咗3次。
經常有爛便，要餵抗生素作治療，基本上頭一個月抗生素係無停過，因為佢真係太弱。
約25日 ~ 4個月大
接近一個月大(約25日)
開始貓奶加雞肉蓉一齊餵，
由於佢體弱腸胃差，轉罐罐雞肉蓉有機會肚瀉難以吸收。
所以雞肉蓉係自己買雞胸肉，蒸雞並打成蓉。
約一個月大(約32日):
喺無再食抗生素既情況下，開始加松蓉強壯身體機能，並且增加雞肉蓉+肉粉量，減少奶量
(因為奶貓明顯食雞肉蓉既量會多過奶)
1- 4個月大
戒左奶，越食越多雞肉蓉，仲慢慢會食乾糧，再餵食不同補充品強壯身體機能。
5個月大
終於穩定，可以打3合1針啦。
醫生做完初次檢查發現，幼貓有弱陽性冠狀病毒(FIP)。
弱陽性，並不等於該貓隻已受感染，但體內有冠狀病毒反應。
所以最終會唔會確診FIP，要睇之後身體既抗體夠唔夠強壯去打贏冠狀病毒。
為加強身體免疫力，自製鮮食餐，5a，松蓉，肉粉，喺1歲前都無停過。
一歲後
自製鮮食餐和肉粉依舊無停，再加入其他糧伴粉及不同肉類作主食。
5a和松蓉由之前每日1次，變成每2日一次，再變到後期既一星期2次。
依家佢已經2歲多，腸胃無一般貓咁好，要不定期食下胃粉，但叫做無病無痛，亦喺無中FIP之下咁成長。
後記:
義工可能會用到既奶粉：
1. 初生貓奶粉：
a.法國皇家-初生貓奶粉(Royal Canin-Baby Cat Milk)
– 包奶樽1個＋不同大小奶嘴3個
– 奶嘴比較軟身，初生奶貓都容易吸吮
b.貝克-初生幼貓專用奶粉 (PetAg KMR – Kitten Milk Replacer)
– 奶樽奶嘴要另外買，奶嘴比法國皇家既硬
2. 急救貓奶粉：
法國皇家 – 病癒康復處方(Royal Canin – Convalescence Support)
– 適合體質很弱的高熱量配方
– 容易入口及消化
– 奶樽奶嘴要另外買
🐱🍼一般所需奶量和餵食時間：
第1-3天 每2小時餵奶一次;
第4-10天 每4小時餵奶一次; 晚間隔6小時餵奶一次
第11天之後 每4小時餵奶一次;晚間隔8小時餵奶一次
第4天開始，每天的奶量目標都是前一天的120%。
雖然奶貓的品種、身型、活動量及睡眠，初生貓的奶粉和奶量都會影響奶量需求，但奶量需求一般都是遞增或停留1-2天相等奶量再遞增。如果一天內奶量需求急降或停止進食，請盡快找對醫治奶貓有經驗的醫者。
不同的貓會有不同的習慣和個性，有些貓的胃比較小，有些貓不喜歡一次飲太飽，主人可以作出調整並最大化奶貓的奶量，例如：
1. 先放尿後餵奶，餵了第一次奶後讓奶貓休息 10-15分鐘， 之後再放尿餵奶
2. 將餵奶時間都包含在4小時的間距中，盡量餵1天5餐
3. 輕聲細語哄貓並多稱讚 ( 對我的奶貓有用）
注意事項：
1. 如初生貓狀態正常，出生的第一天已可以用奶樽餵奶。 較弱的貓可能會需要針筒餵奶。除了極虛弱奶貓之外，盡量在第3天完全用奶樽餵奶。只要奶嘴夠軟易吸，奶貓會更容易學會用奶樽。
新手用針筒餵奶較容易出意外，如奶入肺部，會返魂無術。
2. 餵奶時間盡量在 30分鐘內完成，確保奶貓有足夠的睡眠時間，令奶貓身體機能發展得更好，亦減低肝臟負擔。
3. 奶嘴不宜一次過剪太大，避免一次過吸入過多奶而濁親，並谷奶上鼻子。如谷奶上鼻子，可用口輕輕吸出。
